Page Back

Poetry Index

Merciles Beaute - a poem by Geoffrey Chaucer

Merciles Beaute

1. CAPTIVITY 

Your eyen two wol slee me sodenly, 
I may the beaute of hem not sustene, 
So woundeth hit through-out my herte kene. 

And but your word wol helen hastily 
My hertes wounde, whyl that hit is grene, 
Your eyen two wol slee me sodenly, 
I may the beaute of hem not sustene. 

Upon my trouthe I sey yow feithfully, 
That ye ben of my lyf and deeth the quene; 
For with my deeth the trouthe shal be sene. 
Your eyen two wol slee me sodenly, 
I may the beaute of hem not sustene, 
So woundeth hit through-out my herte kene. 

2. REJECTION 

So hath your beaute fro your herte chaced 
Pitee, that me ne availeth not to pleyne; 
For Daunger halt your mercy in his cheyne. 

Giltles my deeth thus han ye me purchaced; 
I sey yow sooth, me nedeth not to feyne; 
So hath your beaute fro your herte chaced 
Pitee, that me ne availeth not to pleyne. 

Allas! that nature hath in yow compassed 
So greet beaute, that no man may atteyne 
To mercy, though he sterve for the peyne. 
So hath your beaute fro your herte chaced 
Pitee, that me ne availeth not to pleyne; 
For Daunger halt your mercy in his cheyne. 

3. ESCAPE 

Sin I fro Love escaped am so fat, 
I never thenk to ben in his prison lene; 
Sin I am free, I counte him not a bene. 

He may answere, and seye this or that; 
I do no fors, I speke right as I mene. 
Sin I fro Love escaped am so fat, 
I never thenk to ben in his prison lene. 

Love hath my name y-strike out of his sclat, 
And he is strike out of my bokes clene 
For ever-mo; ther is non other mene. 
Sin I fro Love escaped am so fat, 
I never thenk to ben in his prison lene; 
Sin I am free, I counte him not a bene.

 
Merciles Beaute
- a poem by Geoffrey Chaucer
 

A poem can stir all of the senses, and the subject matter of a poem can range from being funny to being sad. We hope that you liked this poem and the sentiments in the words of Merciles Beaute a poem by Geoffrey Chaucer you will find even more poem lyrics by this famous author by simply clicking on the Poetry Index link below! Choose Poetry online for the greatest poems by the most famous poets. 

Page BackPoetry Index 2015 Siteseen Ltd Cookie PolicyBy Linda AlchinPrivacy Statement